الطبعه الثانيه عام 1997
مجدي نجيب
قلبي
*
1
*
فرفطوك في الأغاني
بعتروك في الحكاوي والبكا والنوح
وبقيت مشعلق على جناح الهوى .. مجروح
من غير ما تعرف
ناس في الهوى .. باعوك
وناس قليلين
إشتروك
بعتروك .. ودوّبوك
في الحكاوي والبكا والنوح
قلبي زي البحر ما اتأثرشي
وزي الفرح ما اتأخرشي
قلبي اللي رافض أنين النواح
مفتوح تملّي ع البراح
منوّر .. كما شمس الصباح
قلبي بلون صبري
بلون سِحْنِة المصري
لاكن ..
علّموه الحزن من بدري
علّموه في الحب يبكي ويتوجّع
دوّبوه في قلب أحزان الوداع
وف صوت المراكب اللي هاجرت من زمان
وذكريات الفرحه اللي مشيت ما هدّت ..
لاكنها اتهدّت وضاعت في الزمان
أوصيك يا قلبي
أرفض غُنا المماليك
والرقص والتنطيط على الأوهام
وع الأحلام اللي مش هيّا
إمسك حياتك بين ضفتين دفا ايديك
غنّي بالأخضر
موالك الأخضر
أوصيك يا قلبي ما تحبش في الغناوي الحزينه ..
نبرتها الحزينه
واعشق في العيون الحزينه ..
دمعتها الحزينه
امسك نهار الفرحه
امسكه
تبّت على ايديه
هات الأمل واغسل شفايفه
هاته متكحل بفرحة البحر الطازه
وبكره
بكره يا قلبي
نعجن التواريخ
ونسوّي في رغيفنا الطازه
أحلام بتمشي تتغندر .. وتكركر في لذاذه
والله إن نصفني زماني يا قلبي لشْتري قارب
واملاه صبايا من ورود ضحك الحبايب
وارسم ع القلوع ..
طير الهوى العاشق
وعاكس الموج
ما يهمنيش لو ييجي بيصرّخ وهايج
وايه يعمل الموج
للي مركبه عايق
أوصيك يا قلبي
أرفض غنا يجعل صباحك ليل
وارفض ليل .. يشدك لبحر الويل
وبعد صبر قليل
بعد مشوار بسيط .. وقليل
ح ترسى على شطوط المستحيل
ح تلاقي الأمل في ناس
لسه بيعرفوا يضحكوا ويحلموا ويروّقوا
ويضموا بعضهم ويزقزقوا
يرموا همّهم على ضفاف شفايف النيل
*
*
2
*
بلون غيطان القمح
قلبي
بلون عيون الفرح
بلون كلام الصفح
قلبي
بلون شفايف صاحبي اللي مش خايف
وحلمه اللي أكبر
وبيكبّر ع المخاوف
وياما انجرح قلبي في أحضان
حناجر الليل الطويل
وف دمعة المواويل
في الغنا في الرداوي ع القهاوي
ياما بكى قلبي على قلبي
كما بكى النيل على حزن ضل
عابر سبيل
معلش يا قلبي
سحبوا علينا سلاح الهجر .. جه فينا
ولبسوا تياب الهجر
شربنا المر وقت العصر ما .. درينا
ياما اندبحت فوق كتاف قمر الليالي
وطرحت صبّار بلون وش الخريف لاصفر
وعافرت واتجننت
وسهرت واتشعلقت
وقفت .. وسرحت
زي اللبلابه العطشانه بتحلم بربيعها الأخضر
بلون غيطان القمح
قلبي
بلون كلام الصفح
بلون عيون الفرح
قلبي
أوصيك يا قلبي
إن كنت تعشق لم تدرّي الناس
إعشق نغم عايق التقاسيم
يسهر معاه الفرح اللي فارش مطارح
فوق شفايف، على خدود النسيم
وفوق بيبان وشبابيك حواديت اللقا
قالوا الجميل فين
أنا قلت فين عقله
قالوا الولد ده زين
أنا قلت زين عقله
والله يا صاحبي
لو تدّي للمجنون .. ألف عقل فوق عقله
برضك بيعيش بعقله ولا يتبع كلام الناس
*
*
3
*
أوصيك يا قلبي
فوق بحار الغربه .. ما تعديش
للي بيبخل بضحكته
رُد له كلمته
إهمل حكمته واتركه في دمعته يعيش
في كلام الفرحه .. غني وعيش
مع الكداب
إبعد .. وما تمشّيش
أوصيك يا قلبي تكون
كما الأمل
فرحان بيتمخطر .. على سدر هذا الكون
داوي بدقتك برقتك بضحكتك
صوت عمرنا المحزون
إفرش بأفراحك الطرقات
السكه اللي ضاعت ح تلاقيها
وكله .. راح يهون
على أفراحنا لو بنخاف
الحزن يهون
يا قلبي يا مجنون
أوصيك تغني وتبعد عن شفايف المشوار ..
مرارة الصبّار
أدّف فوق بحار الصعب
إخلق من المستحيل .. نهار
يا قلبي خليك دار
وجار بيسأل ويعشق كل جار
يا قلبي خليك دار
لكل متغرب في الزمن محتار
كما كلمة خير
تحلم ترقص تحت عيون الأمطار
زي الحنيّه ..
لما تضلل في ركن أمان
وقالوا الجميل فين
أنا قلت فين قلبه
قالوا الحبيب ده زين
أنا قلت زين قلبه
قلبه لو يساع الناس
عمره يعيش أخضر
*
*
*
حبيبتي
*
1
*
بنعذب بعضينا كتير
بنغرب بعضينا
وبتبعد خطاوينا كتير
ونتوّه أفراحنا كتير
ونعيش في جراحنا ونتعدّى بصبر المشاوير
أصحاب .. لاكن غربا
وندوّر ع النغمه الجارحه ..
والكلمه الصعبه
طب ليه بنعيش الأحزان ..
واحنا في قلوبنا جناين فرح
يقدر يتفسح فيها الغير
واحنا لو صادف في قلوبنا الجرح
عاشقين الفرح
بنحب نعيش على أمل الجاي في بكره
الجاي بيضحك ونضيف
زي رغيف العيش
يا حبيبتي
أوصيكي لو كانت سكتنا بعيد
مشاويرنا ما حتعرف تتعرّف على قمر العيد
أوصيكي نمد ايدينا
ناخد بإيدين بعضينا
تاخدي بإيدي بعمري
وتعدي وتنطّي على سور الحلم
وف كل الأيام
يتبسم في شفايفك
طعم جمال الحرف الصافي المتصافي
زي الأحباب
ما نضيّعشي الحب ولا صحابُه ..
في معاني عتاب
أوصيك يا حبيبي تكون لي نهار
دراعاته الدافيه بتحضن جدران الدار
اللي يحب
عمره ما يكره أبدًا حدّ
دايمًا يتنفس .. نَفَسُه يطرح ورد
ويعيش فدادين إحساس
ويشوف في عيون الناس الودّ
يا حبيبي اللي يحب
يمشي ويبدر أفراحه وتسكن في جدور الأرض
ونا وانتي
أنا وانت صُحبتين من ورد
أوصيكي تعيشي ف شجرة أشواقي
تطرح أفراحك
على أوراقي
ترسم أحلى نسيم
ييجي ويرقص
على شبّاكي
أوصيكي تكوني الحب
قناديلي ودليلي .. وسط الأغراب
لو راح الفرح وغاب
ما نعيشّي بنتعذب غُربا ..
على برد الأبواب
وتخلّي حلمك لاخضر يشتاق
لجناين فرحه ف قلبي ونبعد ..
عن كل فراق
أوصيكي تكوني الشمس الفرحانه ف يومي
واللون الحلو على هدومي
وتكوني ربيعي في خريف الحزن
وتكوني شمعه ولمّه ف سهرياتي ..
وتكوني نديمي
وف ليل الزحمه تكون لي الحلم اللي بيحلم
ببراح
كوني كلمه بسيطه ..
في شفايف كل الأفراح
وساعتها
أسرح
أفرح
أرتاح
*
*
2
*
باوصيكي بالضحكه الحلوه ما تهرب
من ضيّ
عنيكي
بسلام .. وكلام الصدق الدفيان
يفضل لمسُه بيتجدد
بين حضن إيديكي
مستغرب أتمسكن على شط عنيكي
أو تاني أراضيكي
حتى .. لما بداديكي
بلاقيكي
دايمًا في عيونك أشباح الخوف ..
وبحار الحزن المجنونه
بنخاف
من إيه ح نخاف
طول ما الحب معانا
طعم الفرحه ما ينسانا
طول ما بنرسم بيتنا على شجر الفل
عمر الضلمه ما تسكن جوّانا
لو فاضت أنهار الحزن
راح نجري على أقرب مينا للحب ..
نقعد .. نتسلطن
طبعًا ممكن
انتي الوعد ومكتوبلي
وانت منقوش على توبي
على سدري وأوراقي ومشاويري
يا حبيبتي
لانا سندباد .. ولا الفارس الخيّال
يمكن .. خيال
لانا الشاطر حسن
ولا انتي ست الحسن
إحنا ولاد .. زمن متغابي وبيحابي الغربا
رغم الفرحه المرسومه ..
على وش صحابي
*
*
3
*
يحميكي كلامي يحميكي .. يخلّيني
تاني وتاني أحميكي
من غدر الحلم المعجون بالآه
*
*
*
صاحبي
*
1
*
كان دايمًا صاحبي وحبيبي
لو قلت الآه
يداويني حبيبي
كان لي بسمتي
وضحكه ف كلمتي
ولحظة لقا
وضيّ لدنيتي
وكان
كان دايمًا لما باتنهد
أسمع قلبه بيعزف نغم التناهيد
أفرح
ألقى الفرحه جايبها على خدوده ..
زي هلال العيد
كان دايمًا صاحبي ف أسفاري وأشعاري
ياما سافرنا وبحرنا في كل الأنهار
وسهرنا وغنينا
وزرعنا سنابل أفراحنا على برد النار
على ورق المواعيد اللي بعيد
كانت غناوينا تبكّي الأوتار
كان ..
كان دايمًا صاحبي وحبيبي
أوصيك في ليالي الوحده يا صاحبي
لو قلت الآه .. تداويني يا صاحبي
أوصيك نتواحد
نتواجد
ضلنا واحد في طريق الفرح
أوصيك تبعدني عن ألم الجرح
نبقى فرحتين مزوّقين جناحين لطير واحد
نتغرب
بنقرّب تاني ونتواعد
في الزمن المر
تداويني يا صاحبي
في الزمن المر .. تمرّ بأفراحك
تمسح أنفاس الحراس .. في الليل الغامق
لو قت الآه ..
أنا صاحب عاشق
*
2
*
وف يوم
هبّت ريح الحزن ف يوم
أخدت وياها رسومات الحب ..
من أول يوم
واتعلم قلبي ف زمن العشق يخاف
وف يوم .. ما اعرفشي ازاي
أنا ضعت وبسأل:
ليه حال الدنيا كده
ليه بس يا دنيا كده
نتغرب .. نتعذب ونعيش الأحلام المسروقه
زي عيون الفرحه الباكيه ومجروحه
في عيون ألوان رسام
ليه بس يا صاحبي
ليه حال الدنيا كده
باوصيك
بعد .. كل دا
تسرقني يا صاحبي تهرّبني من إيد الأحزان
وداع
ياللي اديتني أفراح
أنا كنت ما بعرفهاش
ومسحت جراح
بسحابة مطره .. أكتر من مرَّه
وسقيتني الراح
بعد ما راح
حلمي المرتاح
*
*
*
غزلية
*
بصّيت في صورتك
لقيت صورتي
رميت حزني
رميت حيرتي
قريت في الصوره عنواني
هنا في عيونك ..
هنا .. عنواني
هنا قمحي
هنا فرحي
هنا ودّعت أحزاني
هنا في عيونك
هنا عنواني
هنا عنوانّا
هنا في عيونّا
قاعده أفراحنا
إتعلم يا حبيبي تفضل في عيوني
تفضل كُحل الفرحه اللي بيضحك
على شط جنوني
أوصيك يا حبيبي ما تهربشي وتفضل ..
عايش على ضل عيوني
غمضت عيوني عليكي
طيّرت الشوق حواليكي
وزرعت دفايا البردان
في حضن ايديكي
وغزلت كلامنا وأحلامنا
على دمع الأوتار
نرجع في آخر الليل
فرحه ح تملا الدار
أنا في عيونك
وانتي في عيوني
زي بعض
صحاب
صُحبتين م الورد
صحاب
في رحلة الحب
أو .. رحلة العذاب
أو نسمه مرفرفه ف حيره
في ضل صوره على سدر سبوره
أو في عيون متكحله بغيرَه
أنا وانت جنب بعض
صحاب
صحبتين م الورد
أوصيكي ما نقولشي الآه
نحضن أشواقنا ونقول الله
الدنيا أهي قدامنا
بإيدنا نقدر نخلق أحلامنا
نعرف أفراحنا
ونودّع أحزان راسمالنا جراحنا
يرقص في عيونّا غرامنا
الراقد عطشان على بابنا
أوصيكي للفرح نقول له تعال
للحزن محال
أوصيكي في كل الأحوال
مهما تعبنا ومشينا مئات الأميال
ما نقولشي الآه
نحضن أشواقنا ونقول الله
من غير الحب الدنيا ما تمشيش
من غير الحب ما نقدرشي نعيش
من غير الحب ما نقدرشي نعيش
*
*
*
الحلم
*
رحتْ لَكْ المدينه
ودمعه بترسم
الكحله في عنينا
لقيت المدينه
سهرانه .. وانت مش فيها
ونا ياما عشت أصبر
إنت فين يا حلم يا أخضر
أوصيك يا حلم البني آدمين
تفضل أخضر في الليل
ويشوفك كل الناس فدادين م الخير
رحت لك المينا
وآهه ع الشفايف
بتنده للسفينه
لقيت السفينه
سافرت وانت مش فيها
ونا ياما عشت أصبر
وانت فين يا حلم يا أخضر
أوصيك يا حلم الناس الحيرانه السهرانه
تفضل ويّانا على كتف نهار
بيضوي ف قلب الليل
وتصحّي مواويل الفرحه البردانه
وتصهلل على ضهر الخيل
أوصيك يشوفوك الناس فدادين م الخير
رحتْ لَكْ كل حتّه
غرّبت قلبي على غربة المشاوير
سألت عنك
الغني والفقير
ورحت لك بلاد
زي فرحه بتسبق ..
ضحكة الميلاد
وزي نظره بتعشق
الخطوه للميعاد
قالوا لي إنت مش فيها
ونا ياما عشت أصبر
إنت فين يا حلم يا أخضر
أوصيك لما تيجي تبل ريقي وريق صديقي
تكون أخضر مروّق ومتزوّق كمان ..
بألوان الحنان .. والدفا والأمان
ما تجيش لنا لابس هدوم سودا
ولا بتبكي على بوابة الأحزان
تعالَ بأحلى ابتسامه معجونه
في ربيع بسمة الألوان
ولما تيجي تزورنا في ليل ما فيهشي نجوم
إبعدنا عن شط الهموم
خد بإيدنا معاك
نصحى .. نقوم
نشوف الدنيا جايه لنا بتضحك في صحبة ورد
يا حلم إملا الأرض
باتخيلك فارس وراكب فوق فرس عمري
للضي طالع مطالع وضحكه ع الشفايف
على خضره في عيون شجري اللي خايف ..
على نجوم عمري
وانت فين يا حلم يا أخضر
باوصيك يا حلم الناس
ما تكونشي مداس
في رجلين الحزن
أو ليله تئن
أو .. ما تزورشي الناس
*
*
*
النجم
*
1
*
يا نجم
ياللي في السما بتأدّف على سدر السحاب
بتحلم وعمرك ما حسيت في ليله بالعذاب
أنا وانت من بعيد أصحاب
لاكن
اسمحلي مرّه بالسؤال
إنت في السما رحّال
ونا ع الأرض باشرب مرارة الترحال
لا باشتكيلك لحظة الخوف ولا لحظة الحزن ..
ولا باطلب شيء مُحال
ولا باسرق الفرحه من شفايفك
ولا بالحلم أسرقك على أي حال
إنما .. وانت في السما
أنا هنا دايب في كوباية عذاب
أنا هنا ع الأرض
وانت وصحابك فوق في السما ..
زي الندى ع الورد
أنا في السما رحّال
ونا ع الأرض باشرب مرارة الترحال
سبحان مغيّر الأحوال
باسألك: مين صحابك
طُل حواليك .. ودوّر
لمين انت ح تنوّر
ولمين ح تتغندر
وامتى تتعاجب
وامتى تعرف الواجب
أوصيك تلف البلاد وتصاحب
اللي يستحق بحق ..
بارمي عليه شالي
واغطس في حضنه .. أنا وهلالي
قدامك رجل صيّأد فقير .. أهو .. شايفُه
صبّرُه
وامسح الحزن اللي عايش فوق شفايفُه
ومكحّل نور عينيه
صيّاد .. وراضي بقليلُه
البحر عاجز إنّ يدّيلُه
أوصيك يا نجم السما تدوّر .. وتعرف وتتعرّف
فين حلم البشر
ليه فرحهم هاجر ومتخوّف
ناس بيحلموا بلحظة وداعَه
لحظة سلام .. بطير الفرحه يسرقهم
يعدّي حلمهم فوق بحار المستحيل
*
*
2
*
صدّقني
ما تستاهلشي الحياه مننا كل يوم دمعه
ولا تفضل عيون البشر دامعه
خليك مع اللي رافض ..
الحزن واللوعه
والمسافر المهاجر واللي قاعد ..
ومتلهّف ع الميعاد
تنوّر للي متغرّب .. تنوّر له على شطوط البعاد
تفكّرُه بضحكة المحروسه اللي دايبه ..
في ليالي الصبر والموال
*
*
3
*
لسه وتملي وح نفضل .. مستنظرين
قطر المحبه .. للوصول
ما هو كان زمان
كل شيء بأصول
واتسرق حلم الكبار والصغار والبلاد
والسارق .. مجهول
*
*
*
الشاعر
*
أنا بامسّي .. والمسا .. واجب
واجب على ناس .. بتعرف الواجب
لاكن
عيون الناس ما راح تعلا على الحاجب
أنا بامسّي .. والمسا .. واجب
غنّى المغنواتي ف سلطنة ملكُه:
راجل وله بيت
أنا بقول راجل وله بيت ينظر لحريم تاني
يستحق الأدب
أنا بقول يستحق الأدب مفيش كلام تاني
عشّمني أبويا بالحلق ..
خرّمت أنا وداني
ما جانيش الحلق يا ليل ..
ولا نابني غير تخريق وداني
يا مين يقول للعجوز يرجع صبي تاني
ومين يقول على اللي راب ..
يرجع حليب تاني
ما احنا سمعنا مثل من اللي قبلنا قالوه:
الناس أجناس لاكن ..
توب المرجله غالي
أوصيك يا شاعر
في زمن ما حدش بيعرف حد
زمن مستهلك .. وأهلك كل أهلك
زمن ما يستاهلك
باوصيك ..
بلاش تسقينا معاني الحلم دي ساده
ولا نغرق في أحزانّا
على دمع الوساده
حنّ لقديمك حتلاقيه .. غيّر
مالك يا عليل ..
جيرانك .. اشتكوا منك
راحوا العلالا ..
وخافوا يبتلوا منك
أمك وَبُوك يا عليل وأهل البلد كِرْهوك
لك رب موجود ..
أحسن من أبوك وأمّك
*
*
*
القمر
*
1
*
زي نُص قلبي .. هلالك
بيرقص في السما صُحبه
وحبّة نجوم عيالك
ولما يرقص نص قلبي مع هلالك
أسألك: كيفك .. وأحوالك
تقوللي في الفضا سهران وداير باغنّي
أسألك: أولادك ..
تقوللي:
البشر كلهم
زي نُص قلبي .. هلالك
وينعس القلب الوحيد
على رعشة التناهيد
ويحلم القريب .. بالبعيد
وتقرّب المواعيد
ويرقص القلب الوحيد
زرعت ابتسامتك في الفضا وقاعد بتتسامر
مع حبيب سهران
كان معاه حبيب .. هاجر
ماهي نعمة النسيان .. دوا
وهجرة الأحزان .. دوا
وفرحة الفرحان .. دوا
لو تروي كام عطشان ..
في الحب دا .. هوه الوفا
أوصيك ما تنساني
ولما ترقص بضيّك ع المعاني
أرفض معاني الصبر لو كانت ..
معاني الصبر سارقاك وسارقاني
بحبك ومش نادم ولا قلت يا خساره
ما انت القمر برضُه
واحنا لسه فوق كتاف الأرض برضه
احنا ناس الأرض التعبانين
الملوّنين قصص الكدب يوميًّا
والمتلوّنين زي جنّي وجنيّه
لسه بنحبك
ما هُم قالوا عليك في الشعر:
قمر تشبه برتقانه
وتشبه قلب عاشق صغيّر
ونا نصّ قلبي تاه
وعن محبوبُه بيدوّر
*
*
2
*
أوصيك
لما ترقص رقصة التوهه في الصحرا
وتشوف دمعة التايه على الرمل حيرانه
وسهرانه حرّانه
إبقى افتكر ليلى والمجنون
وليالي بكريّه ..
في نظرة العيون
حاول تكون ونّاس مع الناس
في ليل الغربه وتبعتر نجومك على سدر البشر
بأجمل الإحساس
ولما تطلع على ضفاف النخيل باوصيك
تبارك كل من عاش سجين صبرُه
ولما تطلع على كتاف جدّنا الكبير النيل
حاول تفتكر
أسطورة اللقا .. بعد الغياب
ولما تتدلّى ف دلع على بيوت المدينه
وتقابلك الدمعات
وحكايات
حزينة النهايات
إبقى بارك الرسام اللي راسم اسم مصر
بخضرة الألوان
وبارك القمح والدُرة والقطن
ورعشة الكيزان
وبارك النسمه اللي طايره مروّحه بسرعه
لاجل تمسح عرق حرّان
وتمسح الدمعه اللي ماشيه وخايفه ..
من فرحة الإنسان
ومع كل إنسان يتيم أرجوك تكون ..
أخضر الدراعات
ومع كل إنسان يتيم تكون شبّاكين فرحه
ويقعد تحت ضلك ضيف سنبله طارحه
للعطش بكره على وتر الكمان
*
*
3
*
خُلصت المشاوير
فرحها وحزنها
حلوها .. ومرّها
ما بقيتشي قمر لونك برتقاني
أو مدوّر كما وشّ الرغيف
ولا ع الخدّ وردة شجن ..
شارده وفارده عطرها
ولا كلمة حب عايشه سهرانه في الأغاني
أو همسة غزل طايره بترقص ..
فوق شفايف الأحباب
شفناك كما بركان .. وكان .. ومات من زمان
حفنة رماد وحجاره
ياللي كنت زي الحلم المستخبي
في أحضان المحاره
*
*
4
*
يا قمر
ياللي كان لونك برتقاني
أنا نُص قلبي معاك
ونُص قلبي لسّه تايه في المعاني
ياوصيك
لما يكتبوك ..
أصحابي الشُعرا والرسامين رايحين يرسموك
قمر في الأغاني
حاول تقرّب منّنا
وتبقى زيّنا
قمر بيعرف في الأصول
متحمّل ومتفائل وبتعاني
من كل ألوان وأحزان المعاني
وخايف تتشنق يوم
على فروع الشجر
من غير ما راح نعرف
مين .. وفين هوه
اللي جنَى وجاني
*
*
*
المغنواتي
*
بغبغان غُنا
تسمع من هنا .. أي معنى
تلقط من هناك .. كل معنى
تطلع علينا بزيف معنى
وتقدّم لنا سهرة المزازيك ..
وتغنّي خيبة المعنى
إيه اللي جاي تقوله
إسمع المغني الشعبي قال إيه
زمان غنّى والدموع في عنيه:
الناس لها بخت
ونا .. نابني ربع بخت ومال
والبين عملني جمل
واندار عمل جمّال
أنا قلت يا بين
هوّه الحمل التقيل ينشال
قال:
يا جدع بطّل وعوَعه وامشي
إن كان زمنك كده
إيه يعمل الحمّال
يا مغنواتي
الناس ليها بخت .. وانت ليك عشرين
والناس ليها حب .. وانت ليك خمسين
تضحك علينا في الغُنا وتبكي قدّامنا
لاكن فرحتك عايشه وملو العين ما صدّقنا
على إيه بتضحك ملو العين ..
كدبه تمسخرنا
على إيه بتضحك علينا ..
نفسك تصبّرنا
قلت الهوى ملكك ما صدّقنا
ومسكت الهوى بإيدك
وحفرت نهر كبير لمعنى الحزن ومدمّع
"طفيت الشمع .. رميت الورد .. يا حبيبي"
نسمع غُناك نزعل
عشان .. بنعرفوش
نسمع غُناك نهرب ..
عشان .. ما نسمعوش
ونسمع المغنّي اللي مات مجهول
نسمعه بيغنّي ف حنجرة أرغول:
دخل المسا وحل الليلي
دخل المسا على قليل الحيلي
يا رب يا موجود .. هوّنهالي
إنت القوي .. ونا ضعيف الحالي
يا رب يا مولاي .. عدّلهالي
وانت الغني .. ونا فقير الحالي
أوصيك يا مغنواتي
حاول .. فكّر معانا
تعرف وتتعرّف على معنى جوّانا
جوّانا شيء ما فهمتوش
ولا تعرفوش
شيء ما عبّرتش عنه إطلاقًا
تعبنا
عشان اللقمه بنجيبها
شقانا
عشان الكلمه نعرفها
سهرنا
عشان الفرحه نحضنها
شوف المعاني زمان:
أمانه يا بحر .. خِلّي ما جاش ملا منك
أسمر جميل المعاني .. يختشي منك
كان منطق البحر قاللي: كان هناك خلّك
من طول غيابه عليك .. قطع العشم منك
أوصيك يا مغنواتي
الحب
مش بالدموع ولا طفيْ الشموع
ولا ف وجع الضلوع
الحب جوه الناس
وياما ناس
هربوا من قلوب الناس
وياما ناس
تاهوا من إيدين الناس
لاكن حبهم .. بقي زيهم
ماشي جنبهم .. لسّه ضلّهم
أمانه يا بحر
نتساهر أنا ويّأك
عشان شربة حبيبي
خسّست ميّاك
أقعد على الشط وانطل ميّتك بيدي
وتنّي أبكي بدمع العين لمّا أملاك
أوصيك يا مغنواتي
بلاش تجيلنا ف أي صوره لملاك
اخلع ملابس التشريفه
والبس المعاني الشريفه
وغنّي لنا بدون الآه
*
*
*
زوجتي
*
1
*
سقف واحد .. وبيت واحد ..
بيضمّنا سوا
كلمه واحده .. فرح واعد ..
بيجمعنا سوا
نحلم
ونقسم اللقمه والنسمه ..
نقسم الأفراح في كل لمّه
ولما نتعاتب
ننسى الكلام .. سوا
سقف واحد .. وبيت واحد
ونا وانتي
انتي قُلّتي وداري
وانتي
كلمتي وجاري
وانتي
أوّل الحدوته وآخر ضحكة دفا حاضنه مشواري
وانتي
أختي وصاحبتي وناسي
وقمره ونّاسي
في زمن عتمه ولمّه وزحمه فوق راسي
وانت يا حبيبي
ليلاتي ياخدني الفرح يصوّرني على ضيّ عنيك
يرسمني دفاك
وهواك مشتاق:
ورده بتطرح على شط ايديك
باوصيكي يا أم ولادي الصبحيه
تودّعيني بابتسامه
وتلاقيني بابتسامه
وحتى لو تعبانه .. حيرانه
لو .. هموم الدنيا زنقاكي
إرميها واهربي ولاقيني وناديني بابتسامه
في سكة السلامه
باوصيكي يا أم ولادي
تشيليني دايمًا في عيونك
وتخافي عليا لو يشرد معنى في كلامي
أو أي غمامه
بتحاول تسرق أحلامي
ليلاتي
نجيب الفرحه نزرعها
شجر أخضر ونرسمها
وتيجي اللقمه نقسمها
وآخر الليل .. نقول يا ليل
ما عمر ف يوم
تزورنا هموم
ولا نغرق في مطرة عتاب اللوم
ولا كلمه .. تفرّقنا
وليلاتي ياخدني الفرح يصوّرني على ضيّ عنيك
باوصيك يا حبيبي
بمراكب فرحه تعدّي من زمن الكُرْه
نهرب بغرامنا من غيط الغربه
نزرع فدادين العشق محبه
نتواعد على شط الفرحه أنا وانتي
ونعدّي على كل الأيام الصعبه
لو لقمة حب ضغنّونه .. ح تكبر
لو كلمة حب ومكسوفه .. ح تكبر
لو نجمه بنعرفها ح تسهر وتغنّي فوقينا
تحرسنا ونسهر
لو لقمة حب ضغنّونه
اللقمه ح تكبر
بياخدنا زمانّا ويرمينا ساعات في غابات الأحزان
إنسي وخلّينا نقرّب على شط أمان
ويزورنا الشوق الفرحان
ننسى خوف الأيام من بكره الآتي
و .. ليلاتي
باوصيك يا حبيبي ليلاتي
نجيب الفرحه .. نرسمها
وتيجي اللقمه نقسمها
وآخر الليل
نقول يا ليل
ما عمر ف يوم
تزورنا هموم
ولا نعرف دموع وعتاب ولا وجع أو لوم
*
*
2
*
كل يوم .. وكل صبح
واحنا قدّامنا رغيف العيش اللي مدفّي ايدينا
واحنا بنشرب كوباية الشاي اللي بتضحك لينا
أوصيكي تنسي امبارح
لو جارح
ورزالة بعض الناس
واحلمي بالضيّ الماشي يتمطّع
زي اللبلابه في أحضان الفجر
وافتكري بس الصفح
للناس اللي بترسم عمر الملايين ..
فدادين خير
والناس التايهين على سيف الفقر
لما الشمس بتتبغدد
تمشي تعزف غنوتها
وتجدّد يومنا ما نتنهّد
وتلاعب خوخ الفرحه على خدود الصبح ..
واللون الوردي اللي مندّي على خدّي وخدّك
بنشوف بعضينا
راضيين بالفرحه المرسومه ومقسومه ..
على أدّي وأدّك
ونشوف نفسينا
زي العصافير بتشقشق ..
على حبل الضيّ الفرحان
وتعيش غناوينا وتتمرجح وتزقزق
تبعد عنّا الأحزان
نتكلّم ونقول الحكمه اليوميه:
بيروح الإنسان
وبيفضل منّه الحب
بيروح الإنسان
وبتفضل سيرته وبس
نفتكره ساعات
تطرح جوّانا شجرة حكايات
وذكريات عمرنا الملهوف للضلّ أمان
الصدق
أوصيك يا حبيبي تكون على كتف الخلق
زي رايات الحق
وتكوني حقيقه في زمن الكدب المتشعلق ..
على كتف الصدق
كل يوم .. وكل صبح
*
*
*
الليل
*
يا ليل
ضفايرك شلالين
وع السدر عنقودين نجوم
مرفرفين على كتف النخيل والنيل
يا ليل ..
وآه من جنون شاعر
بيعزف ع المشاعر هوَس مجنون
أنا ضعت في المشاوير
في القلب اللي عاش مسروق
والحب اللي بات مخنوق في غُنا المواويل
يا ليل
وكنت دايمًا غطايا وغطا الحيران
ويصاحب نجومك
عاشق سجين خوفُه
ويسقي القمر بكفوفُه ..
صاحب في الهوى عطشان
وتونّس السهران
واللي التقى نفسه وحيد في وسط القوم
واللي ماشي فوق أرضه
بينادي صباح الحب يطلع
يا ليل
آدي صبي عاشق مضيّع في الهوى عمره ..
وضيّع وحيّر فوق شفايفه كلام اللوم
أوصيك تقوم
تاخد بإيده
وترسم فوق عنيه ..
صباح الحب طالع معاه بيغني
غناوي مُفرحه .. ماليه شطوط الكون
أوصيك يا ليل .. تكون
كما الأب الحنون
على صبي شارد بيحلم ع الرصيف
بيحلم بالقمر رغيف
بيحلم بالعيون تعرفه
تحضنه
تقوله أي شيء
تقوله بكره
بكره أحسن م النهارده .. أكيد
*
*
*
مزيكاتي
*
النغم "بيّاتي"
ونا طالب بياتي
في نغمه مصريه
مش طالب تزيد وتزيد
واقعد أستزيد
بالحزن متسلكن
وينزف في الهوا آهات
النغمه ديّا في ودني مش هيّا
مش ممكن تكون بتعبّر ع اللي جوايا
النغمه دي معايا
النغمه دي معانا
زي شمس النهار على غيطانّا
من أول مشوار طرب
إنضرب قلبي لغاية يومنا ده
النغمه "تركيه"
بتعمل عمايل ..
وتتمايل تنبله وكسل
وحب متزوّق مش أصيل
حب متخفّي .. أخرس التفاصيل
ومغني طالعه مشاعره مقطّعه بآهات ..
كما الهلاهيل
ويتمايل مع رنة الخلاخيل
وكفايه بقى من التنهيد وخوف الويل
م الحب اللي بات مدبوح
والعمر اللي ماشي ينوح
والقلب اللي ما بيبوح
يا ليل .. أمان .. يا ليل
النغم "بيّاتي"
ونا طالب بياتي
في نغمة الحريه
أوصيك يا مزيكاتي
اخلق لنا نغمه بتعبّر وتقدر على التعبير
ما احناش محتاجين التنبله في الحب
الحب اللي ما بيشوفشي ..
أكتر من مسافة شبر ف عمر بكره
إبعد عنّنا طعم الآهات المُرَّه
وأعلا بالصرخه اللي بتدوّي ..
وسط النغم حُرَّه
النغمه دي .. نغمة "صبا"
ونا أصلي من الغبا
مشدود إليها
بتاخدني من إيديها
تسرقني من حلمي
اللي نفسه يستحمَّى
ويقعد مزوّق مروّق على خدود الربيع
النغمه دي
نغمة "صبا" بتسرقني .. وتدفّيني وتخبّيني
تحت البوابات القديمه
والناس القديمه
اللي قدروا بحلمهم
يعيشوا ويعدّوا ويخلقوا الحريه
أوصيك يا مزيكاتي
قدّم لنا أحلى نغم
وامسح لنا عن طريقنا الألم
وشوف لك أي شاعر
ما يكونشي م اللي معاه ..
قلم مغشوش ويكتب لك
*
*
*
الفراق
*
1
*
بنفترق ونتفرّق ساعات
ونتبعتر على حبة نغم
فوق رصيف الأغنيات
بنفترق ونتفرّق ساعات
في معنى متلوّع .. ضعيف
في دمعه متحرّره هربانه ..
من برودة الخريف
دنيا دوّاره
دايره محتاره
بتلفّ وتاخدنا
لعتمة المغاره
ونفترق ..
في كل شارع .. وحاره
في آهة المزامير
في نسمه بتعيّط
فوق شفايف العبير
وبنفترق كتير
ونتقابل في غنوه ..
حزينة التعابير
ونتقابل على وشوش
فرحها مغشوش
نفترق في الحال
ونتقابل .. مرَّه صدفه
على وش بنت بشوش
شوف الحياه ..
هوه دا حالها
زي الزمن
ما يعرفشي في طعم أو لون المُصالحه
ويعرف في الخصام
ويعرف يكشّر
*
*
2
*
أوصيك يا حبيبي
لو سرقت بسمتنا لحظة خوف
نتأمل .. نسأل ونشوف
ليه الخوف
جايلنا يغني على باب القلب المتزوّق
ليه الخوف
زي السهم المجنون المتشوّق يرشق في قلوبنا
ليه العاشق دايمًا
زي حمام الغيّه
مهما بيتوه .. تاني بيرجع
ويغني ف ملاغيّه
لربيع الفرحه بحريه
علشان بيعدّي بحلمه ما يغرقشي
أوصيكي يا حبيبتي
لو بحر الحزن صادفنا، نعدِّيه
لو موجه ما بتشوفشي
جايه تبعدنا، نعدِّي ونسكت ما نقولشي
إن الفراق مكتوب علينا
مرسوم على عنينا
أو .. على وشِّي
*
*
3
*
أوصيك بالفراق .. مش لينا
مهما توهنا
الصبر ع الأحزان ماهوش لينا
وتزغرد النجوم ساعة لُقا
ويرقص القمر
على اكتاف ليالينا
نفتكر دايمًا
شط الحنان .. كلمة وفا .. في عنينا
*
*
4
*
نفترق .. نتلاقى من تاني كما الأصحاب
بلاش غربة مشاعرنا وحرقها في عتاب
أو نشحت الفرحه اللي تاهت
ورا .. كل باب
*
*
*
الشهيد
*
النسمه رايحه تحكي
وراجعه تاني تحكي
عن أسمر حبّ سمره
كان رايح يشتريلها
فستان بلون القمره
وعقد لون عيونها
الأسمر راح ما جاشي
من يومها .. راح ما جاشي
راح
عشان البلابل
ما يسكّتهاش ألم
لا ودَّعنا .. ولا اتكلِّم
ولا سلِّم
وزي النسمه ما ترفرف ..
على أرض جبينها متألِّم
ما ودَّعناشي
ما قالشي أي حاجه
ما قالشي الأرض محتاجه
ولا الدنيا محتاجه
ما قالشي الأم محتاجه
وصّانا كلّنا بحاجه
بالأرض
أرض الوطن محتاجه
*
كان رايح يشتريلها
فستان بلون القمره
وعقد لون عيونها
من يومها .. راح ما جاشي
الأسمر راح ما جاشي
رسم على جبينه وابتسم ..
ليل حزنه القديم والجديد
كتب على دراعه
اسمه القديم والجديد
ليعيش دماغه لفوق
ليروح شهيد
دوّرت في المكاتيب اللي كان بيبعتها
كان يقوللي الحرب واجب
ومهما العيون ..
علْيِت على الحاجب
الحرب واجب
والتعب والتضحيه .. واجب
يا بني آدم عصرنا الحديث
صاحبي كان عريس
كان رايح يشتريلها
فستان بلون القمره
وعقد لون عيونها
من يومها راح ما جاشي
الأسمر .. راح ما جاشي
*
*
*
طفل فلسطيني
*
يا صاحبي يا صغيّر
زي نجم السما
زي حلم كان كبير في الزمان كبير ..
وصار صغيّر
بسمتك زي الهلال وسط الجراح
عيونك صاحيه بتصوّر
أوصيك
تنسى الجراح
على سدرها تحلم ببكره تتصوّر
يا صاحبي يا صغيّر
ياللي واقف في الفضا بترسم شكل بيت
ما حتسكنوش
وقمر في السما ..
وحتى وهوه شايفك
ما حتعرفوش
واقف على باب الخيام
دبلان كما عود الدُرَه
تمشي في الليالي وتهرب من عيون ..
البسمه .. وضلة الأحلام
لا عمرك عرفت ضل فرحه
ولا يوم ملكت لعبه
ولا عشت ليله في حلم أبيض في أمان
زي المركبه الماشيه على شطوط الجفاف
تعصر الشمس في عيونك
تسرح إيدين الزمن ..
ترسم تجاعيد على خدودك
ويجعلوك تسهر .. تخاف
ولما تصحى .. ح تحضن في فراغ
تلقى المسا ضلك وضلّيلتك ماهيش ملكك
رسموك على كروت المعايده
وانت واقف متشرّد
وطلعت في السيما وفي النشرات
بلا فايده
وصرت في الحكايات
حبة ذكريات
وانت برَّه الخيام .. لسّه واقف بتحلم بالسلام
باوصيك
رغم رماد الأحلام
تتذكّر كل مواسم تيجي وتضحك لك ..
على أرضك
ولا تنسى أبدًا جرحك
تحلم ..
وانت بتلعب في تراب الأرض
وانت بتلعب وسط جراح الأهل وأحزانهم دايمًا
اتذكّر أرضك
والجرح على جبينها بيرسم
مأساة الإنسان العربي
الأرض
الاحتلال .. وآهة الموّال
ولوعة الترحال
من وطن .. لوطن
من يوم .. لشهر
من سنه لشهور
إكبر على صوت المقاومه
على الكلمه المساومه واللي تاجرت بيك
يا طفل الأيام المعصوبه ..
والأحلام المرعوبه
إكبر فوق الجرح وباوصيك
تفضل صاحي وفي عيونك
رسم الوطن باسم
قلب الوطن راسم
حضن ودفا ليك
*
*
*
الرجل
*
كان دايمًا يغني في ليل الوحده موّالُه
كان دايمًا يغني ف ليل البعد موّالُه
ويغني وراه الناس ..
يتغنّوا بكل ما قالُه
قال كتير وكتير
قال عن الغني
وقال عن العظيم والفقير والأمير
جرى اللي جرى يا ناس ما كنت بيه داري
أنا بعد يا ناس ما كنت أستُر ع العيوب داري
أنا إن نصفني زماني لارْكب جوادي
واخُد م العدا .. تاري
وإن خدت تاري .. تبرد ناري واشكي لمين؟!
كان راجل عجيب
يلمس الشمس بعيونه ..
تبتسم خُضرة الحياه
ترمي بدفاها .. تفرشه ..
في كل زاويه واتجاه
ما كانشي يعرف في قولة آه
.. وكان
دايمًا يقول الحكمه .. ورا الحكمه:
لو كان دمع العين يجيب الغايب
كنا ملينا الطرق .. والمسارب
وكان دايمًا يقول الكلمه .. تعيش الكلمه:
يا رب صبّحنا بصباح الخير
صباح خواجه .. ما عليه .. دين
يا رب صبّحنا صباح .. جديد
يشبه هلال العيد
يا رب صبّرنا صبر أيوب
صبُر لما وفا بالوعد والمكتوب
وراح فين؟!
ما حدّش في يوم ح يعرف
اختفى من عيونّا وساب رساله:
الأرض كارهانا بخطانا
رافضه كلامنا وصحابنا وأحبابنا
والوطن بيلعب لعبة العسكر ..
مع الحراميه
وهوه .. طيّب النيّه
وساعات بيعشق الأكاذيب ..
والكدابين
ع الملأ .. علانيّه
أوصيك تزورنا .. ولو مرَّه
نسهر ونتسامر وندفا برضُه بالمرَّه
ونتونّس
بالملاغيّه
بحبة صدق
تدفينا
في ليله شتويّه
*
*
*
المصري
*
1
*
مشيت مع التاريخ
كتبت في التاريخ تواريخ
مسحولك التواريخ
هويت كتير الناس
هويت ودايمًا ما انتهيت
وسهرت في الحواديت
وحلمت
على أدّ حلمي
ما طلعتش القمر
ولا نزلت ع المرّيخ
ما حسّيناش بأحزانك
ولا بتعبي
ولا بقلبي اللي لسّه
ضلّه بيصلي ع الحيطان
في جنة التواريخ
إنتَ أكيد مصري
أنا اللي ضحّيت بقعدة البيت السعيد
وبدفا المواعيد
ولمة الأهل
وونسة صديق
ومشيت بحلمك على رماد الحريق
مشيت .. مشيت
سلاحي قلم .. وداويه
وحبة كلام دفيانين
وانقتلت
في كل حته انقتلت وقمت
هنا قتلوني العثمانيه والأتراك
هنا نسفوني الإنجليز
هنا باصحى من تاني عنيد
أنا المصري القديم الجديد
أوصيكو
إنزعوا راية الحداد
أخرجوا بحلمكم برّه البوابات والبيوت
وانفضوا من ع الحيطان والعيون
حدوته شتويه
مزروعه بالرماد
*
*
2
*
أنا شفت كتير زمان
زمني رماني
ومشيت ليل طويل
طوّل ضفايره على أحزاني
صُبرت .. واستحملت وانقتلت
مُت ألف مرّه .. إنقتلت
وباصحى من تاني باوصيكو:
اهدموا معابد خوفو
إطلعوا بالشمس فوق كل دار
إخلقوا نهار
إرفعوا الأسلحه بعيد عن صدور أهلكم وأصحابكم
إنسفوا كدبة الآهه ولوعة الأحزان
*
*
3
*
بنتقابل
لو فيه ميعاد
لو مفيش .. بنتقابل
لو فيه مكان
لو مفيش .. بنتقابل
ننفض جراحنا
نخلق صباحنا .. ونتقابل
وأفراحنا نزرعها
في ليل البعد نحصدها .. ونتقابل
لو فيه ميعاد
لو مفيش .. بنتقابل
والنهارده .. اتقابلنا
طلعنا فوق سور كتافك
سوا .. وجهًا .. لوجه
زي التماثيل المشروخه
زي الكلمه المرعوبه
في عيون وشفايف أولادك
أوصيكي
بخضرة النخيل في عنيكي
بلمسة دفا إيديكي
تفكّي حبال الصمت وتنطقي
أصرخي
باموت
تحت ضفاف شفايفك
أحضنك
من غير مانا شايفك
تهربي مني بمخاوفك
دايمًا باهرب بكسوفي وخوفي
والاقيكي
ماشيه ف طوابير الموت
حتى بعد ما باسكت
همسك .. يرجع يداديني
باندهلك أرجوك تداويني
مهما نفترق
تاني ح نتلاقى
إنت مشتاق
وانتي مشتاقه
نتجمّع تاني في أحضان لذة خوفنا المجهوله
أوصيكي
لو شوفنا الحب نعيشه
ونعايشُه
نتقلِّب على فرشُه
نداديه .. نهديه لصُحابنا
طيّب .. لما يهاجمنا فرسان الخوف؟!
نتسلّح بالحب ونصحالُه .. نشوف
أهو
ياما قتل من غير سيوف ألوفات
ياما خدّرنا في الزمن سنوات
لاكن
كنا بنرجع ونقاتلُه
زي أي خوف جالنا .. من سنين قبلُه
من زمان
بنعرف بعض في الصور القديمه ع الحيطان
في رسمات الفراعنه
في رقصة ضلّنا المعجون ..
بسخونة الألوان
مع تكبيرة الآهه في ليلنا الطويل والفجر ..
لما بيكبّر .. ينوّر مع صوت الأدان
ويتدلّع .. ويتمطّع
في حضن الدفا .. في أمان
مرّه تانيه يضمّنا صوت النخيل
نهرب بصهدنا .. متغرّبين ع النيل
نمشي ع الشوط وندوّر
عن الأهل والأصل النبيل
من بعد ما اتقطعت دراعاتي
في روح أزوريس
من بعد ما فرّعت آهاتي وذكرياتي
في قلب إزيس
تاهت الأحلام في طين الأرض
واختفت مع الفيضان
ونا
أنا من يوميها مكتوف الإيدين
مغرّبني موج النيل
بالمّ نفسي بنفسي وبحاول
أكحّل الشفّتين
بكلمة اعتذار بايخه
بافكّرك بولاد ولادك
بعمر مكرم
بعبد الله النديم
بالشيخ مصطفى البشتيلي
وهوه في طريقه للإعدام
ماشي على قلبه بتنشّن بنادق الفرنسيس
بأم صابر .. بفلاحين دنشواي
بصلاح الدين
بالدم اللي زرعنا بيه فدادين
باوصيكي واحنا الصبحيه بنشرب كوباية الشاي
نتذكّر .. ما نكونشي
أوّل ناس ناسيين
*
*
*
إبني
*
يا أجمل لوحه بترسمها إيدين الرسام
يا أحلى كلمة صفح
يا غصن سلام
يا فرحه .. في شفايف كل العشاق
يا نسيم العصريه على نار الجرح
وظنون الناس
والحلم المشتاق
بشوفك
فارد جناحاتك .. على ورق الأشعار
على خارطة كل الأسفار
وبتعزف بابتسامه
فوق شفايف الأوتار
بتلوّن رماد وش السنين
متلوّن كما طائر الفرحه
دافي .. كما همس الحنين
أوصيك يا ابني
إتذكر التواريخ
وحكمة التاريخ
وافتكر دايمًا بلادنا
وازاي عبرنا وعدّينا فوق ضفاف الجرح بيها
وازاي بدرنا وزرعنا عمرنا لاخضر ..
بين إيديها
.. ولما تمشي في الشوارع
وتشوف البيوت السمرا حاضناك
الأرض والأبواب والعيون والناس
وضحكة الفوانيس القديمه
في الحواري القديمه
إبقى افتكر في اللحظه ديّا
إفتكر بسمة الحريه
لما مشْيِت في نفس الشارع
ونفس التاريخ
إتذكر التواريخ
وحكمة التاريخ
مشيت مع الرجّاله المرسومين على حيطان المعابد
في لوحات الرسامين في القرن التاسع ..
والعاشر .. والعشرين
رافعين في الطريق .. رايات النصر
إفتكر صرخة الأيتام
وفرحة الأعلام
وهيا بتقطّع في وش الفضا
وتخربش الأيام
إفتكر
هنا كان الرجال
ما بيعرفوش أبدًا مُحال
هنا وقف جدّك .. وعمّك وَبُوك
هنا وقفم قرايبك وأهلك ..
في وش العثمانيه
والإنجليز والفرنساويه والأتراك
ما خافوش المشانق وودّعوا زوجاتهم
ودّعوا ولادهم وأصحابهم
ودّعوا الأشواق
ودّعوا كل شيء كان بيحلم وكان مشتاق
وكان بس قدّامهم ودايمًا
وش مصر
اسم مصر
نبض مصر
أوصيك يا ابني
لما تمشي في الشوارع القديمه
وتشوف البيوت بتضحك
دافع عنّها
بالكلمه
بالرسمه
بالبارود .. بالورود
بغصن سلام .. بأسلوب الحضاره
بالاحتجاج في مظاهره
بكل شيء تملكه
إمشي وضلك في جانب ضلها
ضلّل عليها
تضلّل عليك
وتشيلها بين عيونك
تشيلك بين عيونها
تكحّل عيونها بيك
تفرد إيديها في المحن ..
تمدّ ليها ايديك
دي مصر هيّا الأم
والحبيبه اللي عاشت عمرها .. خايفه عليك
أوصيك
ما تخليش الحزن ف يوم
يقعد متربّع حواليها
أكتر من يوم على وشها
أو سدرها
أو .. في سنابل فرحها
ولا يقرّب في ثانيه ..
من حضنها
*
*
*
آخر الوصايا
*
1
*
أوصيكم
لو شوفتوا الفرح مرَّه
حاولوا ترسموه
لو جاي مستورد .. ومتبغدد
استحملوه
لو جاي بيرفرف على ضهر الوطن الحزين
استغفروه
لو جاي من قلب طيّب
استقبلوه
الفرح للناس كلها وبيسرقه مواطن حويط
آه .. لو تفهموا
قبل ما تسقفوا
أو تموتوا من شدة فرحكم الغشيم العبيط
*
*
2
*
لو شوفتوا الفرح صاحب
مش عايز يصاحب وطن غلبان
عشان كاره حبة بشر .. مستثمرين وباعوه
وبيعيّطوا على ورق الجرايد بالدموع
أنصحكوا ننسى وجع الوطن
ودمعه الحزين وقلبه اللي بات موجوع
وكمان
لا بد تنسى كل ما ليه علاقه بالرواقه
ما احنا لغاية ما نوصل للنزاهه
بننسى الكتير كتير .. وبالأخص دا الموضوع
*
*
3
*
أوصيكم
لو شفتوا الحزن حاله .. محاله
إنسوا نفسكم في كل حاله
واشتروا همّ بكره عليكم ده كفايه
الزمن ده .. فيه كتير نقص في حكمة الرجّاله
*
*
4
*
لو مرَّه .. قريت جريده
أخبارها ضحكت عليك
إرميها في الزباله
بناقص شوية البراميل
وشوية الرجّاله
*
*
5
*
لو مرَّه .. خبر مبني للمجهول
عن الفلاح طيّب الذكرى ومرَّه ..
فرحان بيغني على الأرغول
يعني سعيد وعمره مديد والوطن جوّاه
منعنش ومتضفّر في الوريد .. وإسوِرَه في الإيد
إنسى الخبر على طول
وما تصدقشي
انتهى من القواميس
كل إنسان حسيس
وابتدا مشوار خسيس
واتملت بيوتنا في يوم العيد
بلوعة ودمعة التناهيد
*
*
6
*
أوصيكم يا صحابي
في زمن
ماحدّش ح يقدر يحمي بابي
ولا ح يعرف إيه اللي صابني
ولا مين اللي دبحني
ولا مين اللي باعني
ولا مين اللي دفعني كل ليله
أمصمص عضم حلمي
أوصيكم بس ننسى
زمن الحلم انتهى من عمرنا من بدري
*
*
7
*
لو شفت الفرح ساعي في المساعي
وراعي وطن خربان
وبيدافع بالأغاني في المسامع ولا حدّ سامع
في خطب الجوامع
ولا في حزن المواجع
تقدر تقول ملوْ بُقك
ده وطن مغشوش
وانصحك تنساه
ولا تعرفوش
*
*
8
*
ده زمن مرسوم على وش الخريطه
كان البشر متغندرين .. أو مقهورين
أو كانوا .. بحكم الوجع عاشقين
أو .. كانوا بحكم الطوارئ ع القانون خارجين
كلهم بلا استثناء
عاملين لنا ظيطه
آل يعني هما اللي نجيوا من سفينة قهرنا
وهما منتصرين
إنسوا لعبة الساده
اللي كل يوم بنقرا أهم أخبارهم
لصوص .. كما أيام زمان على الصدور راقدين
بس في ملابس زمانّا
متغيّرين
في الصور .. آخر هندمه
والرصيد من دمنا يا أمنا طلع السما
ده .. كلنا
احنا ع الخريطه حبة بشر متنيّلين .. متنوّمين .. راضيين
*
*
*
اعتذار
*
كل اللي قلته .. هوه حلم
يمكن في بكره .. يبقى علم
يمكن أغيّر جلد حلمي وحلمكم
يمكن نلوّن حلمنا بحلم المستحيل
يمكن بلاوينا سببها كلكم
يمكن أنا
يمكن الشيطان اللي جالنا بلا استئذان
يمكن ملاك الرحمه من توابع رحمة الرحمن
يمكن علامة تعجّب وراها علامة استفهام
*
حرام نظلم أي حد
كلنا اشتركنا بجداره في كل شارع وحاره
في صناعة زمن تافه ملوش معنى
إلا إنه يكون معانا ضاع
كل شيء .. كان له معنى
*
*
*
اعتذار تاني
*
كنت باحلم يا صاحبي يا صاحبتي
يا شمسي يا قمري يا ولدي .. يا بلدي
يا اللي وصيّتي كانت كلمتي الدفيانه
دفتني في طول شتا بردي
ما هي بلدي
أنا كنت باتعكّز على حلمكم
كلكم .. على بعضكم
طلع حلمكم عاجز بيتمشّى
ويتعشّى على طرابيزة الوزرا
وكل ورده في الفازه استبدلوها بكام مُزَّه
ونا اللي ياتمهمز .. وأتقزقز
وأتهزّأ .. وأتمسخر .. وأتأخّر
وانطرد من الطابور
ويخوْزقوني على الخابور
لأني قاطع طريق
وصيّتي كانت كلها ليكم
الحلم .. حريه
والحب حريه
أوصيكوا
بكره لازم عشان تطلع لنا شمسُه
الحلم: حريه
والصدق: حريه
والكدب والغش ما نعرفوش
ولا ليه في قاموس فرحنا .. أي ديّه
ليست هناك تعليقات:
إرسال تعليق